ନୂଆଦିଲ୍ଲୀ,୦୨/୦୯: ବିହାରରେ ଭୋଟର ତାଲିକା ସଂଶୋଧନ (ଏସ୍ଆଇଆର) ମାମଲାର ଶୁଣାଣି ସୁପ୍ରିମକୋର୍ଟରେ ହୋଇଥିଲା । ନିର୍ବାଚନ କମିଶନ ସର୍ବୋଚ୍ଚ ଅଦାଲତଙ୍କୁ ଜଣାଇଛନ୍ତି ଯେ ଚିଠା ଭୋଟର ତାଲିକାରୁ ବାଦ୍ ପଡିଥିବା ଭୋଟରମାନେ ସେପ୍ଟେମ୍ବର ୧ ତାରିଖ ସୁଦ୍ଧା ନିଜର ଆପତ୍ତି ଅଭିଯୋଗ ଦାଖଲ ଲାଗି ଶେଷ ସମୟ ସୀମା ରହିଥିଲା । ଏହା ପରେ ମଧ୍ୟ ସେମାନେ ଅଭିଯୋଗ ଦାଖଲ କରିପାରିବେ । କିନ୍ତୁ ଭୋଟର ତାଲିକା ଚୂଡାନ୍ତ ହେବା ପରେ ତାହା ଉପରେ ବିଚାର କରାଯିବ । ଯଦି ତାର ଯଥାର୍ଥତା ରହିଥିବ ତେବେ ତାକୁ ଚୂଡାନ୍ତ ଭୋଟର ତାଲିକାରେ ସାମିଲ କରାଯିବ ।
ବିଚାରପତି ସୂର୍ଯ୍ୟକାନ୍ତ ଓ ଜୟମାଲ୍ୟ ବାଗ୍ଚୀଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ, ଏସ୍ଆଇଆରକୁ ନେଇ ଯେଉଁ ଭ୍ରମ ରହିଛି ତାହା ବିଶ୍ୱାସର ଅଭାବ । ଏଭଳି କ୍ଷେତ୍ରରେ ରାଜନୈତିକ ଦଳମାନେ ନିଜେ ଏସ୍ଆଇଆର ପ୍ରକ୍ରିୟାରେ ସାମିଲ ହେବା ଉଚିତ । ସର୍ବୋଚ୍ଚ ଅଦାଲତ ବିହାର ଆଇନ ସେବା ପ୍ରାଧିକରଣକୁ ଆପତ୍ତି ଅଭିଯୋଗ ଦାଖଲ କରିବାକୁ ମତଦାତା ଓ ରାଜନୈତିକ ଦଳମାନଙ୍କୁ ସହଯୋଗ କରିବାକୁ ପାରା ଲିଗାଲ ଭଲ୍ୟୁଣ୍ଟିୟର ନିଯୁକ୍ତ କରିବା ଲାଗି ନିର୍ଦ୍ଦେଶ ଦେଇଛନ୍ତି । ପାରା ଲିଗାଲ ଭଲ୍ୟୁଣ୍ଟିୟରମାନେ ଏ ସଂକ୍ରାନ୍ତ ଗୋପନ ରିପୋର୍ଟ ଜିଲ୍ଲା ଜଜ୍ଙ୍କ ନିକଟରେ ଦାଖଲ କରିବେ । ଯାହା ଉପରେ ଆସନ୍ତା ୮ରେ ଶୁଣାଣି କରାଯିବ ବୋଲି କୋର୍ଟ କହିଛନ୍ତି ।
